الثوره الباسمه 2

اري الكثير من التفاؤل بالثوره الثانيه وربنا يجعلها فاتحه خير بس في راجل عاجوز جارنا وانا بكلمه عن الموضوع ده
قالي "عارف يا ابني لو نزلتم التحرير ووقفتو ايد واحده بجد هتنفذو كل اللي نفسكم فيه غصب عن العسكر وغصب عن الطخين , لكن لو نزلتم وبان بينكم فرقه هتكونو انتو اضعف من ان اضعف كلب من كلاب السلطه يدوس عليكم بجزمته وساعتها استعوضو ربنا في الثوره .. الايام علمتنا انه مفيش حاجه مفيده بس وان كل حاجه ليها فايده وضرر خدو بالكم يا عيال وربنا ينصركم"

وليه اعمل دماغ , مانا عندي واحده..

يوما ما كتبت علي صفحتي الشخصيه تلك العباره ((

اذا اسـتـطـعـت فـهـم كـلـمـاتـي بـسـهـولـه ، فـانـت لـم تـفـهـمـهـا عـلـي الـوجـه الامـثـل )) 

وواجهت بعض السخريه من جانب وبعضهم وجه لي النقد والاخر قال مغرور ..

فتابعت قائلا  ((ان اردت ان تكون بين الناس حكيما فلا تتجمهر حين يتجمهرون))

وقلت ايضا ((مائه متر عكس التيار = الف متر معه))

 ثم (( لا ثوابت الجميع يتغير هناك من نرفع الرأس لنكلمهم وهناك من نقترب من الارض وندقق النظر لكي نراهم حتي))

ثم (( المبادئ لا تتجزأ , لكن يمكن تغييرها بسهوله ..))

واخيرا كتبت (( احد اهم وظائف اليد الثانيه هي غسيل ظهر اليد الاولي اذا اصابها الوسخ )) 

المعني واضح لاننا منذ بدايه ثورتنا قلنا الجيش والشعب ايد واحده فعندما توسخت هذه اليد لم تجد يدا اخري لتغسلها

والان بعد ان فهمت المغزي من العباره هل لا تزال تعتقد انك تفهم كلامي بشكل صحيح ..

انا مؤمن تماما انها مسئله منظور .. 

ولكن هناك ما اسميه بالنظريه الاكثر شموليه . 

                                                        لـ حامد عمر

شخص واصل ..

هو شخص واصل ..وفاشل تواصل ..يقولك متعرفش الحلو ابن مين ..لازم لما يؤمر الناس تقول امين ..والنفخه كدابه ..وفاكرنا في الغابه .ابن الاسد يؤمر ..واخطائه بتمر ..والامر اصبح مر .. وفاكرنا ساكتين .. لا فوق يا عسول .. اهو جاك الشعب غول .. لا يهمه ابن صول .. او حتي ابن امين .. ولا حتي ابن المحافظ .. ولا حتي ناس تانين .. اسمع يابني وافهم ..الحياه ادي وخد .. الحياه ابني وهد .. الحياه بوسه علي خد .. وقلم علي تاني خد

                                                     لــ حامد عمر

فقط في مصر ..

انطلاقا من مبدأ التميز و الاختلاف قررنا التالي : 
1- لما هنقول ((الحمد لله علي كل حال)) معناها انه احنا مضايقين شويه لكن لو مش مضايقين هنقول ((الحمد لله تمام)) معناها كده 100 فل وعشره .
2- لما هنشوف زباله ( اعزكم الله ) في الشارع هنقول شعب ...... مع ان انا من شويه منزل كيس الزباله والقطه قطعته ونطورت الزباله يمين وشمال 
3- لما هنشوف واحد بيكسر سور الجونينه او مثلا كابينه التليفون مش هنكلمه لا هنكتفي بالفيبراشن 
4- لما بنعدي طريق اتجاه واحد بنبص في الاتجاهين والسبب هنعرفه في نقطه التميز اللي بعد كده 
5- البروفيشنال في السواقه في اي مكانمحترم هو اللي حافظ تقاليد واعراف وقواعد المرور وبيحافظ عليها لكن من مبدأ التميز عندنا الاخ البروفيشنال هو اللي يعمل كل حاجه عكس قواعد المرور وميعملش حادثه .
6- قررنا كل مانشوف حاجه غلط نقول اصل الناس لسه مش واخده علي الحريه ( طيب ما تخدو ي اخويا هو حد حايشكم ) 
المشكله اني لاحظت ان اللي بيقولو كده كتير يعني لو اللي بيقولو كده احترمو الحريه وخدو عليها زي ما بيقولو اكيد هنحس بفرق .
7- قررنا كمان نشتم التعصب لما يطلع من فريق غير بتاعنا لكن لما يطلع من الفريق بتاعنا يبقي لازم تظهر الاعذار .
8- قررنا منرجعش اي وكسه احنا فيها لاسبابها الحقيقيه .
9-قررنا نفضل ملتزمين بالمثل بتاع باب النجار مخلع .
10- قررنا نشترك في اربعين الف صفحه لمحاربه الفتنه الطائفيه وننزل فيها صور وفيديوهات بتنور المكان ( بنار الفتنه ) .
11- واخيرا قررنا نساعد الغلط من ناحيه ونشتم فيه ( واللي اتنين غلط ).
ارفع راسك فوق انت مصري ...


                                                  لــ حامد عمر