الحلقه الخامسه ( مالك يا فوزي )

في البدايه شكرا لكل واحد سأل عن الحلقه الخامسه وحسسني باهميه ما اكتب عند بعضهم وهذا ما يدفعني لكي اكمل ما بدأت فانا بدون هؤلاء مثل وردة بلا رحيق. .......................................شكراا.


صحيت من النوم علي صوت عم مصطفي ( جاي ) ياااا استاس محمد ...يا استاس محمد 
وصوت ابويا : ايوه يا مصطفي
عم جاي : الاستاس احمد عايز ابنك 
ابويا : احمد مين يا مصطفي 
عم جاي : احمد فوزي قاعد جوا في القهوة
ابويا : ميدو وزفت ...


طبعا اليوم مبشر من اوله كده ميدو وزفت , احلي حاجه في ابويا حنيه قلبه 
دخل طبعا يلا يا ست هانم صحي الطور اللي نايم ده وقوليلو احمد فوزي عايزك 
ماما : صحيه انت انا ايدي مش فاضيه بجهز الفطار.


طبعا مش هقولكم اني كنت اتمني ابوس ايديها حالا بس تدخل تصحيني هي انما هنعمل ايه هي كده ديما محسساني انها بتحضر القنبله الذريه 
باب الاوضه اتفتح .


بابا : انت صاحي طيب مش بتقوم ليه قامت قيامتك 
انا : ايوا يا بابا 
بابا : بابا مش عيب لما واحد هلف زيك ولسه بيقول بابا انت مش كبرت 
انا : ايوا يا بابا مش فاهمك يعني يا بابا لما اكبر المفروض اقولك جدو مثلا ولا ايه 
وبعدين مالك كده يا بابا منطهدني علي الصبح 
ابويا : منضهدك !! يا الف حسر علي جيل التعليم المجاني 
قوم يا افندي احمد فوزي مستنيك علشان تروحو تصيعو في الكليه 


ديما تعبيرات ابويا جامده جدا نصيع في الكليه  علي اساس ان الكليه دي كورنيش مثلا ميعرفش نوعيه الكليه اللي انا فيها 


انا : حاضر قولولو جاي حالا 
ابويا : يا ابني هو احنا خدامين اللي جابوك ما تقوم يلا تشوف صاحبك
انا : حاضر حاضر ...... يووه حاضر 


فتحت الشباك وبصيت علي القهوه العظيمه لقيت فوزي قاعد وطالب شيشه وشاي 
انا : انت يلا .. ايه اللي انت عامله ده الله يخرب بيتك ...  ما تجيب طاوله وتنادي لابويا يلعب معاك احسن.
فوزي : يا عم انجز بقي متبقاش بيضه 
انا : بيضه كده ادام 80 مليون مصري طيب ادخل جوه القهوه يا ابني  الله يحرقك مش طالبه خالص دلوات مشاكل مع بابا .


وبدات البس بسرعه علشان انزل قبل ابويا علشان طبعا لو شاف فوزي كده يبقي فيها مش اقل من شهر بهدله وتريقه عليا و علي اصحابي .

فتحت الباب ووقفت دقيقه كده مستني مريم تفتح لحد لما لقيت ابويا بيفتح الباب نزلت جري علشان اشد فوزي من القهوه واجري قبل ما يشوفو 
نزلت الشارع يلا قوم يلا  قوم وشديته من علي القهوه وبدأنا نمشي ولقيت عم مصطفي جاي ورانا 


عم مصطفي : الحساب يا اساتسه 
انا : بعدين يا عم مصطفي 
المهم رجع وخلاص هنمشي وابويا ظهر علي باب البيت ولعب القدر لعبته ولعب الشيطان في دماغ عم جاي قام منادي علينا 


عم جاي : طيب يا هندسه الحساب واحد شاي وشيشه ....
انا وقفت زي التمثال يا رب ابويا ميكونش سمع والحمد لله دائما ما اتمني يحدث ابويا مسمعش 
اقصد طبعا انه مش بس سمع دا سمع وراح حاسب وبصلي بصه اللي هي لما ترجع يا صايع وقاموس شتايم بعدها 
انا مسكت فوزي من ايده ومشيت بسرعه ( في سري ) مش يا عم جاي وحيات امي لاولعلك في القهوه دي 
انا : ارتحت يا عم احمد  خد عندك بقي مشاكل في البيت شهر ولا حاجه وهناخد انا وانت شتايم تدخلنا الجنه بكره الصبح 

فوزي : ولا فكك مني ومد بقي عايز الحق اولع سجاره قبل السكشن القرد ده 
انا : يا عم  سكشن ايه بس دانا هشوف يومين اسود من وشك 
فوزي : يا عم انت عامل حوار علي الفاضي 


انا بيني وبين نفسي حوار واي حوار يا ابني دي فيها ليله طويله ابويا مش هيعتقني لوجه الله دا غيرمريم اللي مش هتصدق ولا حرف من كلامي وهتفكرني طنشتها


ونشوف المره الجايه ايه هيحصل من ابويا


                                                                             بقلم حامد عمر

الظلم الثوري

قد يتعجب البعض من العنوان وقد يري البعض ان به الكثير من المبالغه ...
لا تتعجبوا لانه فيما سيأتي توضيح لهذا العنوان الصادم 

لا يختلف اثنان في العالم  بمختلف معتقداتهم وتوجهاتهم ان الثوره المصريه  قد حققت الكثير من مطالبها وانها تسير في ذلك الطريق لتحقيق الكثير ولكن نلاحظ انه الان تبدأ مطالب الثوره في التبلور حول تلك المحاكمات واسترداد الاموال والبحث عن عدد اضافي من المتهمين
ونسينا جميعا او تناسينا الشعار اللي خرجنا وحملناه في ايدينا اليسري لان اليمين كانت مشغوله بتقديم ارواحنا فداء الوطن 
لن انسي ازدحام الشوارع والجميع يهتف بذلك الشعار الذي ظننت انه لو كان ثمن له حياتي فهو ثمن بخس

الشعار الثوري ( عيش حريه كرامه انسانيه )
بعد الثوره نزلنا جميعا  الي الشوارع ننظف ونمسح ونطلي الجدران وكلنا عزيمه ان نحول مصر الي ذلك المتحف الثوري الكبير حالمين بذلك اليوم الذي يأتي في السياح لا ليروا الاهرام والاثار ولكن ليروا الشعب الذي طهر بلاده وجعلها اجمل البلدان فقط بيديه

ولكن دعونا نري ماذا حدث لهذا الشعار 

العيش : انزل فرن عيش وشوف الوضع هناك  ومش هقولك انه ده بسبب الثوره لان ذلك المشهد موجود قبل الولاده المباركه للثوره 
ولكن اظن انه كما اتفقنا علي شرعيه مطالب الثوره اولا نتفق ايضا انه لا تقدم ولا يحزنون اذا لم نهتم بالمواطن الفقير وتوفير اول المطالب الثوريه له وهو العيش 


الحريه : حقا ما لم تفعله الثوره يعد كارثه بكل المقاييس فتلك الثوره التي خرجت يوما ما اعتراضا علي الظلم وكبت الحريات هاتفه (يا حريه فينك فينك امن الدوله بينا وبينك) الان تقوم هي بدور المراقب وحاجب الحريات ( امن الدوله سابقا ) فمن يقول رايه بان الثوره لم تكن عملا رائعا لا يكون الاعتراض عليه بشكل عقلاني يعبر عن طبيعه ذلك الشباب المثقف الذي خرج ليهدم الطغيان وانما يكون الرد بأن من يقول كلمه واحدة علي الثوره ( عميل وخاين وبيقبض من بره متنسوش يا جماعه لما احنا كنا في الشوارع اتقال علينا نفس الكلام) لذلك اريد مقارنه عادله بين الشرعيه الثوريه وما تمارسه من افعال وبين النظام البائد وما كان يمارسه من افعال 
النظام البائد كان يمارس حروبا دعائيه ويدعي علي من يقف في طريقه العماله والخيانه وهذا ما تفعله الثوره اليوم  للأسف
ارجو من من رايتهم في الشوارع بجانبي يد بيد وكتف بكتف ان يفيقو من الاوهام  التي يحاول البعض زراعتها بداخلنا بأننا خارقون فنحن كنا ادوات الحق ويجب ان نظل دائما وهزمنا الدعاوي الواهيه لتشويه صورتنا فقط بعقولنا 
وسمعت اكتر من شخصيه تتعجب وتقول كنا نظن ان الشباب لا يعرف الا (عمرو وتامر وابوتريكه ) لكن تاكدو جميعا من خلال المناقشات العقلانيه اننا اصحاب منطق لماذا تخلينا عن منطقنا عندما امتلكنا القوه وهل كنا نستخدم المنطق بديلا عن العجز واذا كان الامر كذلك فأنا لا الوم النظام السابق فهو كان يملك القوه فلماذا يلجا للمنطق ... يبدو انها طبيعه البشر !!

لا اطالب من قفز علي الثوره والذين اصبحوا يملكون من الدعم الاعلامي ما يمكنهم ان يحولو الشهداء الي عملاء لو ارادو ولكن كيف يحابون انفسهم فدماء الشهداء هي تجارتهم التي لن تبور .
اقولها انتم لم تصنعو الثوره وصنعها اجيال ذاقت مرار الذل علي اراضيها 
صنعها عجوز مات ابنه مقتولا في قسم الشرطه .
صنعها شاب اكلو حقه لعدم توافر مبلغ الرشوه المناسب .
 صنعها رجل تم طرده من المصنع لان المستثمر يريد تصفيه العماله
صنعتها تلك السيده التي قتلت في طابور العيش وهي تعدو خلف رغيف لو القي للكلاب لعافته نفوسهم


اخواني تمنيت يوما ان لا يدرس احفادي ان جدهم كان يعيش في اسوأ عصور البلاد
والحمد لله تحقق لي ما اريد .
اليوم اتمني من من ادرك الثوره... كن اكثر عقلانيه فالعقل لم يكن يوما بديلا للقوة
انت الوحيد الغير قادر علي خيانتك فلا تثق الثقه المطلقه
احترم كل الاراء وتذكر مطالبك .
ولو فعلت فقد اكملت الشعار ( الكرامه الانسانيه )


                                                                           بقلم حامد عمر

الحلقة الرابعة

طبعا محدش فينا بيختلف انه لما يومك يبدأ بصوت عصام وابراهيم الميكانيكيه وصوت عم جاي القهوجي وبعدين شويه كلام من ابويا علي ريق النوم وطبعا لن ننسي الدور اللي بتقدمه هيئه النقل العام لازعاج الجماهير من خلال توفير اسوأ نظم النقل في رأيي وحرس الجامعه وما ادراك ما حرس الجامعه ............ ثم الدكتور انها مؤشرات يمكنها في خلال القليل من الساعات ان تبشرك بيوم رائع يمكن الحاجه الوحيده اللي ممكن احس انها تبعث علي التفاؤل اني شوفت مريم الصبح .... مريم اممم 

يااه هي الانسانه اللي لما تشوفها تحس فجاه ان الجاذبيه الارضيه انعدمت وان الشئ الوحيد اللي بيجذبك هي مريم


 المهم رجعت علي البيت طوالي من غير ما اروح كده ولا كدا لقيت مريم في البلكونه وماما في البلكونه اللي جنبها منزله السبت للبقال اللي في الشارع علشان يحطلها فيه حاجه ساقعه وشاورت لمريم كاني بشاور لماما 

وطبعا هي خرجت ادام الباب كأنها بتطلع الزباله 
انا ( بصوت هامس ) : وحشتيني 
طبعا الهمس هنا مش من باب الرومانسيه خالص دا مجرد اجراءات امن لان لو حد سمعني هتبقي عيشتنا سوده 
هي : وانت كمان وحشني يا هندسه ...

قالتها بطريقه ياااااااااااه طريقه بجد متناسبه جدا مع الموقف اللي ممكن نوصفه بايجاز انا طبعا مبهدل وهي لابسه لبس المطبخ وماسكه في ايديها كيس زباله .... يااااااااااااه انا بعشق الرومانسيه 


انا : عندك حاجه الخميس ولا ممكن نخرج شويه 
هي : هشوف وارد عليك 
 وفجأه ماما فتحت باب الشقه ما يلا يا ابني خلتك هنا وجوزها ومعاهم شيرين 
بصيت لمريم لقيتها باصالي كده كانها عايزه تقولي ( عشان كده جيت بدري و شيرين هنا وانا معرفش )


انا : يا ماما هي شيرين كانت جايه ؟؟ 
ماما : اكيد الفرحه مش سايعاك صح ؟؟
انا : يا ستي ابوس ايدك جاوبي علي سؤالي هنروح في داهيه !!
مريم : ازيك يا ماما 
هي متعوده تكلم امي كده 
ماما : ازيك يا مريم عامله ايه يا قمر 
مريم ( بابتسامه باهته جدا ) : الحمد لله مش عاوزين حاجه .... 
ماما : لا شكرا 
انا : يا ماما ..... 
يوووووه مريم قفلت الباب 
ماما : ايوا يا ميدو ماهو شيرين مكنتش جايه بس اهي جت واكيد دا كويس 
انا : فجأه كده رجعتلك الذاكره !!!
 ودخلت .....
غيرت هدومي وطلعت اقعد معاهم 
سلمت علي خالتي وجوزها وبنتها 
خالتي : ازيك يا حبيبي عامل ايه ؟؟
انا : الحمد لله يا خالتي 
شيرين: عامل ايه يا هندسه ؟
انا : الحمد لله يا دكتوره انتي عامله ايه ؟
شيرين : الحمد لله بخير ..
جوز خالتي : ازيك يا افندي ههههههه عامل ايه ههههههه؟؟ ...
سيبكم من ان صوتك بيسببلي انهيار عصبي وسيبكم كمان من اسلوب كلامو اللي بيشلني 
بس ليه بيسألني ما مصر كلها لسه سألاني ادامو حالا عن حالي وقلت الحمد لله لازم يكرر الاسئله !!!


هو : وعامل ايه في الدراسه ؟؟
انا : الحمد لله كويس 
هو : جبت كام في تقدير السنه اللي فاتت ؟؟
انا : اهو كويس 
هو : كام يعني ؟؟
يا عم خليك في حالك  يا لهووووي علي الناس دي 
انا : 54%
هو : بس !! .... دي شيرين بسم الله ما شاء الله جايبه 83% 
انا : ربنا يخليهالك ....( في سري ) يا عم ارحم امي بقي 
هو : عموما شد حيلك علشان تيجي تشتغل عندي في الشركه 
انا : لا ... ماهو انا ناوي اسافر  
هو : فين ؟؟
انا : الهند ... 
هو : الهند !!!
انا : يا جوز خالتي مانا قلتلك 100 مره اني نفسي اسافر المانيا او انجلترا اكتبها علي صدري !!!
هو : يا ابني البلد دي احسن من غيرها ماحنا كلنا بنينا نفسنا هنا 
انا : يا عم الحج انت ماسكلي بنيت نفسك بنيت نفسك يعني هو انت عامل شركه مقاولات !!
 دا مكنش مخزن قديم وحاطط فيه شويه خشب وخلاطه اسمنت  وعمال تقولي شركتي شركتي ...


وخرجت علي البلكونه وسط سيل من الشتائم من ابويا من العينه اللي قلبك يحبها
شيرين جت ورايا : متزعلش بابا طيب بس هو كلامو كده 
انا  : لا ولا يهمك بس اصلك مش بتشوفي ابويا بيعمل ايه فيا بسبب الكلام ده 
هي : انت كويس ... ؟
انا : ايوا يا ستي ادخلي معاهم 
هي : هو انت هتفضل مكشر كده مش شايف اي حاجه تخليك مبسوط ؟
انا : حاجه ايه يعني ؟
وفجأه مريم خرجت في البلكونه بتاعتهم 
انا : لا شايف طبعا حاجه حلوه جدا
شيرين : بجد !! اصل مامتك قبل لما تيجي كانت بتقولي انك دايما بتسال عني 
انا : ايه ده هي قالت كده ؟؟!!
هي : اه  قالت ... وقالت كمان انك ديما بتكلمها عني 
انا : شيرين وضحي كلامك لان ممكن شخص ما يفهم كلامنا غلط.
وفجأه لقيت مريم شاورتلي حركه كده كانها بتستحلفلي 
يادي المصيبه مش بقولكم يوم فقر من اولو  
شيرين : مالك يا باشمهندس اناكلامي واضح ..
انا : شيرين نكمل بعدين يلا ندخل 
ماما : يلا يا ولاد تعالو عشان الاكل 
طبعا مش هوصف حالتي... زمان مريم دلوقت هتولع فيا  ولازم اكلمها وافهمها ... يادي النيله مش معايا رصيد ... يوووووه هي لما بتقفل بتبقي من كل حته 


وبكره نشوف هعمل ايه في الكارثه دي ...




                                                                 يتبع ...

التفكير الحر

استكمالا لما بدأناه في مقال دعونا نمارس التفكير والذي بدأنا فيه الاشارة الي اهمية وجود مفكر حر ...


نتعرض اليوم لما يمكن ان يمثله المفكر الحر من مشكلات لدولته او بمعني اصح لحكومة دولته ...


فكر فيما تفكر ... الطعام والشراب والنوم والحصول علي المال ( بعمل او بدون ) لو انك واسع النشاطات فسوف نضيف الرياضة والسياسه ... اذا كنت متخصصا فيمكن اضافه تخصصك الي قائمه اهتماماتك ....


لماذا تفكر في ذلك ...؟


لماذا لا تفكر لمجرد انك تفكر ...؟


لماذا نري دائما انه من الواجب وجود مشكله حتي نفكر فيها ..؟


لماذا نتعلم فقط لكي نعمل ..؟


واذا كنت ممن يرون الثقافه ذات اهميه لماذا دائما قله هم من يختارون المجال السياسي كمجال توسعي لثقافتهم ؟


انهم من يوحون لنا بذلك ويدربونا جيدا عليه من خلال ذلك المكعب الاسود الذي ينقل لك ولاولادك كل يوم وكل ساعه المنهج الذي من الواجب اتباعه 


انه احد وسائلهم ...


اري مقتنع تماما بأن كل مجتمع يشبه الاخر تماما في التوزيع التالي 
طبقه غنيه يهمها فقط جمع الاموال والحفاظ عليها 
طبقه متوسطه تجدهم دائمي التفاخر بوظائفهم ومرتباتهم وهم يتحملون العمل الاكبر في المجتمع 
طبقه فقيره موجوده فقط لاخافه الطبقه المتوسطه ( الجريمه - او حتي مجرد خوف الطبقه المتوسطه من ان تصبح فقيره )


وانسو امر الساسه فكما اقول دائما انهم هنا ليشعرونا باننا نختار ولكننا ...... مجبرون 


لايمكن لاحد تصور ذلك وسيقول احدكم الان انا استطيع ان افكر بطريقه حره ...انصحك الا تحاول لانك وقتها تكون لست فقط تعير في الوهم ولكن ايضا تساعد نفسك علي ايهامها بانك لست في الوهم اصلا 


المجلات والجرائد والتفاز والراديو والشخصيات العامه المرموقه هي احدي وسائلهم ..


الفكره هي البذره التي لا يمكن قتلها اذا ما تم غرسها في عقول تمثل تربه صالحه فتنمو لتكون افكارا وتنتج الالاف الثمار الفاسده ....
وعندما تكون انت من قام بالانتاج فلا يمكنك ان تصدق ان احد ما هو من ارشدك الي حيث تقف لانك لم تشعر بيده وهي تغرس بذرتها في عقلك لانك كنت صغيرا بالاضافه الي انه غرسها بلطف فلم يؤلمك بل علي العكس لقد امتعك وانت تشاهد التلفاز او المجله ...


فكر كما تريد فانت داخل ذلك الاطار الامن بالنسبه اليهم وما دمت في داخله فانت تحقق الهدف المرجو منك بكل كفاءه ...


تمتع بما انت فيه فلا فرق بين عبوديه الجسد وعبوديه الفكر ...


لقد اديرت اللعبه ولكن بذكاء لا يضاهي فلا تجد من يستطيع حتي الشعور بانه جزء من اللعبه 


انكم مجبرون ....

الحلقة الثالثه

دخلت الكليه طبعا مش هوصف حالتي المعنويه بعد رحله العذاب دي ....

علي المدرج معتدل مارش.... باب المدرج مقفول والحج علي قاعد ادام الباب زي الاسد وادامه مثلا نقول 20 واحد بيتحايلو عليه

وعلشان محدش يفكر ان ده ظرف طارق .... دا الطبيعي كل يوم

المهم وقفت اتحايل معاهم وبعد فاصل من الرجاء وافق الراجل يدخل يسال اذا كان ممكن ندخل ولا لا.... دخلنا وراه

عم علي : يا دكتووور في ناس بره

الدكتور : قلهم يمشو

انا طبعا لازم ادخل كراجل بتميز بالاقدام والشجاعه والاقبال علي المخاطر للاسف

انا :  يا دكتور احنا كتير بره

الدكتور : مش مشكلتي يا ابني اطلع بره

انا : يا دكتور يعني ما هو الناس صاحيه بدري وبتحاول علي اد ما تقدر تيجي في المعاد

الدكتور:  يا حبيبي الكلام ده ميلزمنيش يلا يا ابني امشي

انا اعود محني الظهر مطأطئ الرأس حاملا خيبه املي ومحدش يسالني عن معني الكلام ده انا بشوفو كده في كل الكتب ومش فاهم منه حاجه ....

المهم لفيت للناس اللي ورايا واشرت لهم بالانسحاب قائلا كاحد قاده الرومان : يا جماعه الدكتور بيقولكو يلا يا ابني انت وهو امشو من هنا علشان هو الرخص مسحوبه الصبح و مصدع وابقو تعالو بكره هههههه

طبعا همهمات اعتراض ولكن الكل يسير في اتجاه الباب ومحدش برضه يسال ليه بكتب بالعربيه الفصحي

المهم وارتفع من خلفنا صوت الدكتور : انت يا ابني

التفت الجميع ببطئ في مشهد من المشاهد التي يجب ان يسجلها التاريخ .....

انت يا ابو طويله !!!

انا : انا ؟؟

هو : اه يا خفيف تعالي هنا

انا : ليه بس كده يا دكتور انا عملت ايه ؟؟!!

هو : عملت !! .... دانت عملك اسود ...تعالي هنا

هو : يعني ايه الدكتور بيقولكو ؟؟؟

بيني وبينكم انا اتصدمت يعني هو مضايق من الدكتور بيقولكو

وبالنسبه للرخص او الصداع والضحكه اللي في الاخر دا امان عادي يعني ولا ايه !!!

 انا : ماهو يا دكتور عادي يعني

هو : كمان بتقول ماهو ؟

انا : هي ماهو دي عيب يا دكتور

هو : طيب روح يا ابني اقف جنب الباب لحد لما اخلص محاضره علشان اعلمك الادب

كده حسيت انها كده كده خربانه ...

وقفت جنب الباب والحال مش عاجبني فا واقف الوقفه بتاعت اللي مش عاجبهم !

هو : اقف عدل يا ابني

انا : اللي هو ازاي يعني

هو :  ارجع ورا عند الحيطه ...... لا لا لا متسندش علي الحيطه

انا : هو في ايه يا دكتور ما تقولي ارفع ايدك فوق احسن

هو : دانا هندمك علي اليوم اللي دخلت فيه الكليه

انا : قال يعني انا مش ندمان

هو : قله ادبك دي هتسقطك يلا

انا : هو انا في البيت يلا وفي الاتوبيس يلا وفي الكليه كمان يلا  هو في ايه ؟؟!!

انا : وبعدين هم يعني اللي سقطو قبل كده مكنوش محترمين !

هو : هات يا ابني الكارنيه ...

انا : طيب اتفضل وانا في سيكشن 5 كمان

هو : ورحمه امي لعرفك يعني ايه دكتور

طبعا مش عايز اوصف المدرج حاله ايه خلال الحوار الطويل ده لكن والله ما كان علي حال ..... يعني اصحابي عمالين ينادو عليا ويشاورولي اني اسكت وناس عماله تضحك وناس بتبوصلي بقرف وناس بتشاورلي اني ميه ميه وانا فجاءه فكرت في اللي جاي

شوفت نفسي طالع من بوابه الكليه وكل الناس واقفه ورايا وبتضحك وكان في عيل اسمه مرزوق مش بيحبني شايفه وهو عمال يشاور عليا ويضحك والدكتور واقف بيشاورلي ( اطلع بره ) وناس بتعيط عليا كأني سعد زغلول وفجاءه فوقت من دا كله لقيت الدكتور : انت يا حيوان ..

طبعا لسه الصوره كانت في خيالي من ثانيه بس وانا بنطرد بره

انا : ايوه يا باشا

هو : باشا !! ...

وحواجبه اترفعت  

انا ( بصوت هادي و كأني بشحت منه ) : يا دكتور يعني انا متمرمط الصبح في الاتوبيس وجاي عشان احضر دا مجرد رد فعل بس وانا اسف

هو : اطلع من المحاضره ومش هعملك حاجه بس اياك اشوف وشك تاني

 انا : الكارنيه طيب

هو : خليه معايا

انا : يعني حضرتك مش هتعمل بيه حاجه

هو :لا ابقي تعالي المكتب وخده

انا : كلام رجاله ..

هو : امشي يلا

للاسف ده مش اسوأ ايامي في الكليه لاني زي ما تقولو كده منحوس

المهم خلص اليوم الفقر ده وطلعت روحت علي البيت علشان انهارده انا مخلص الساعه 5 واكيد مريم في البيت من الساعه 12 الظهر ولا حاجه ... دي كليه ايه النحس دي !!!

وطبعا زي ما شوفتو اليوم ماشي بشكل مش مبشر ابدا  انا حاسس اني ممكن بليل اتعرض لمحاوله اغتيال ربنا يستر خالتي جايه انهارده ومعاها جوزها الرخم وبنتها ... ونشوف هيحصل ايه مع جوز خالتي ...

                                                     يتبع ...

الحلقة التانية

هممم ... لاني مؤمن بالمقوله بتاعت  ان الطريق السهل دائما يوصلك للاشئ

اظن اني هكون حاجه كبيره ليه بقي ...

1-  انا عبقري ودي حاجه مفيهاش جدال

2-  انا لماح جدا

3-  مش بحب اتكلم عن نفسي واظن ان ده واضح

4-  طريقي مش سهل يبقي اكيد بيوصل لشئ ما وأظن انه النجاح

طبعا حد يسالني ايه يعني الصعب في طريقك هتشوف ياخويا مستعجل ليه ..

الاوتوبيس طبعا بعد ما وقفت حوالي ساعه وده طبعا لاني في مدينه هاديه وجميله

هييييييييه الاتوبيس جه وطبعا من مظاهر الاحتفال بوصول الاتوبيس كل الناس بتعمل ماراثون صغير لحد الاتوبيس يتسابق فيه الكل المهم ان كله بيركب صحيح الاتوبيس 50 راكب واللي علي الارض حوالي 150 لكن كله الحمد لله بيركب وده كما قال الخليل بن احمد ومحدش يسالني ده مين منعا للاحراج :

الدنيا بأسرها لا تسع متباغضين
...وإن شبراً في شبر ليسع متحابين

وطبعا انتو عارفين اد ايه احنا متحابين المهم ركبنا وانا في وضع شبه وضح الركوع كده و كان واحد ساند علي ضهري المهم شويه والاوتوبيس وقف وواحده ست بس يعني مليانه شويه ... قول شويتين... وعايزه تنزل وطبعا انتو عارفين الوضع ...انا واقف في الطريق يعني لازم اوسع للهانم ومش هشتكي انها داست علي رجلي وفعصتها ومش هتكلم عن لما كانت هتقع وسندت عليا وانا طبعا اترميت علي  الكرسي  وغزني في جنبي المهم ده كله كوووم والراجل اللي قاعد ادامي صوتو عالي وعايش دور الكمسري  وعمال يسال ده نازل فين وينادي علي السواق علي جنب يا رايييييس والكارثه بقي في وسط العدد واللمه الجميله دي واحد طلع علبه السجاير كان هاين عليا ابوس ايده يا بيه بلاش دخان الحكايه مش ناقصه

انا : لو سمحت يا حج بلاش دخان الجو خانقه لوحده

هو : لو مش عاجبك يا افندي ابقي اركب تاكسي

انا : ماهو حضرتك لو معايا اركب تاكسي مكنتش عرضت نفسي لاني اشوف الناس الكمل اللي زي حضرتك 

هو : احترم نفسك يلا 

طبعا مش هقولكو اخر واحد قالي يلا حصلو ايه 

انا : يلا !!! ...... ربنا يسامحك

هو : دا جيل ايه المهبب ده

انا : حضرتك تعرف بابا !!

هو : روح يا ابني ابعد عن الشر وغنيله

انا : يا عم الحج اغني ايه وارقص ايه ده ...

المهم واتمخطر الاتوبيس واحده واحده لحد الجامعه وبدون وصف لكيفيه نزولي لانها بالظبط زي لما تنسي مفتاح الشقه جوه وتضطر تنزل من شباك المسقط

نزلت وعدلت الحاجات اللي لبسها ( اشباه الهدوم ).......

علي البوابه ... لوحه انيقه (ابرز الكارنيه امن الجامعه لحمايتك فساعدهم)

احنا طبعا بنطبق الجزء الاكبر من الجمله دي بنبرز وبنساعدهم لكن حمايتنا ... ولا بلاش الطيب احسن

المهم طلعت الكارنيه

العسكري : الكارنيه دا بتاعك ؟؟

انا ( وانا بضحك ) : اكيد مش هستلفو يعني  ؟

العسكري : بس دا مش شكلك ولا ايه ؟؟

انا : ايوا ماهو انا كبرت وده كارنيه سنه اولي وانا في تالته بس مش شمال

العسكري بصلي كده وقال بصوت كانه بيتخانق معايا

: انت في الكليه انهون؟؟

انا : انهون ( في سري ) .... هندسه

العسكري : مين بيديك ؟

انا : بيديني ايه بظبط حدد ؟

العسكري : انت هتهزر ؟

انا : ليه بس انا بسالك تقصد ماده ايه ؟؟

العسكري : ايه!! .... ماده!! ... اهو اي ماده وخلاص

قلتله علي اسامي شويه دكاتره

ودخلت ....

وفي المواجهه المعتاده مع دكتور الخرسانه هنشوف ايه هيحصل ....

                                                     يتبع .....

دعونا نمارس التفكير

لم اكن ابدا مصري بالدرجه الكافيه لكي انصت الي كلام الدوله فانا اعلم انه مهما بلغ صدقها لن تكون ذلك الفارس القادم من العصور الوسطي ليرفع رايه العدل ولا يكذب ابدا ولو كان السيف علي رقبته


والامر لا ينطبق فقط علي الدوله المصريه ولكن علي كل الحكومات في كل العالم 


ان الشعوب ترتدي نوعا ما من النظارات لا يمكنها من رؤيه الا ما تريده الحكومات 


فليسأل كل منا نفسه اساله غير التي تدور دائما في باله  لان ما يدور في بالك تلقائيا هو ما جهزوك لكي تفكر فيه 


اذا فما نفعله مهما كان عمقه فهو ليس تفكير .... !!!


اذا فلنبدأ لنمارس التفكير او ما تم منعنا من ممارسته من خلال تربيه معينه واسلوب معين في الحوار 


الا يدرك الناس لماذا تختلف طرق التفكير بين الشعوب رغم اتفاقهم علي كونهم شعوب يسعون للاكل والشرب والحريه والديموقراطيه ولكن هناك اساليب تفكير تتجاوز في عددها عدد تلك الشعوب نفسها 


.... الحقيقه ... 


اننا فقط نري ما يريدون ... 
نعم ... ولا خجل من ذلك 


لماذا اشتهرت فكره ان الفلسطينيين هم من باعو ارضهم لليهود بعض حرب اكتوبر المجيد ؟؟
لماذا انطلقت الاقلام تكتب بكل شراسه عن ما كان عليه النظام السابق من قذاره ؟؟؟
ولو قلنا ان النظام هو سبب تكبيل تلك الاقلام ومنعها ... فمعني ذلك انه يمكن اعاده تكبيلها مره اخري ؟؟


لماذا نري الكلام الصادر عن الحكومات دائما غير صريح وغير واضح ويحتمل اكثر من معني ؟؟؟

لماذا تحولت مصر في عيون العرب من مصرائيل والدوله التي والتي والتي  وان شعب مصر الذي يعشق العري والاباحيه الي ابطال 
لماذا بعد ما قيل عن ان المصريين لن يثورون  الا اذا ثار ابو الهول ... تحولنا الي ان المصريين دائما يصنعون المعجزات وان ما حدث ليس بجديد علي المصريين ؟؟


هي يعلم احدكم بتفاصيل ثوره 23 يوليو ام اننا ندرس انه حدثت ثوره لتنقل مصر من رق العبوديه الي سماء الحريه ؟؟
من يعلم منكم تفاصيل حرب 48  غير ان الملك خان البلد والولد واحضر من السلاح ما فسد ليقتل ابناءنا ؟؟


لماذا يعلمونا ان مصر ساعدت الكثير من الدول علي التحرر من الاستعمار ولا نعرف كيفيه المساعده ؟؟
لا تحاولو اقناعي بأن التفاصيل مجرد حشو وليس لها فائده 


دعونا نمارس التفكير في التفاصيل فهي الاكثر اهمية ...

حواديت

الحلقه الاولي 

صحيت علي صوت عصام جارنا متجوز جديد ميكانيكي سيارات اد الدنيا وهو بينادي علي ابراهيم وده الصبي الوحيد اللي عنده في الورشه واللي يا عيني متمرمط معاه 


عصام : انت ياض يا ابراهيم 
ابراهيم : ايوه يا اسطي نازل اهه وعلي م تفطر اكون فتحت ورشيت ادام الورشه  وكله اليسطا 
عصام : يا ابني هو في حد لسه بيفتح دلوات  لما انزلك بس 
فتحت الشباك علشان استمتع بالمنظر الطبيعي ادام البيت واللي هسيبكم تتخيلوه لما يكون واحد صاحي علي صوت الواد ابراهيم والاسطي عصام فلك عزيزي القارئ ان تتخيل المنظر ادام البيت 
بصيت من الشباك علي المنظر اللي بفتح عيني عليه كل يوم وهو منظر عم مصطفي جاي وده مش فعل ده اسم هو اسمه مصطفي جاي
فاتح القهوه وبيرش مايه هو كمان واول لما فتحت الشباك 
عم جاي : ايوا يا ( استاس ) صباحو اشطه ان شاء الله  
مش عارف ليه عم مصطفي جاي مش عايز يقتنع اني مهندس وحتي لو مكنتش اكيد مفيش حاجه اسمها استاس 
انا : ازيك يا عم مصطفي صباح الخير 
هو : صباح النور يا عسل صبحنا وصبح الملك لله يا فتاح يا عليم يا رزاق يا كريم 
خرجت للصاله علي صوت الراديو ( يا صباح الخير ياللي معانا يا اللي معانا ) 
انا : ماما حضريلي الفطار علشان نازل الكليه عندي محاضره بدري 
ماما : الفطار عندك في المطبخ 
انا : يا ماما هفطر في المطبخ هو انا بشتغل عندكم اظن الكلام عادي لحد دلوات بس اظن نطقتها بصوت عالي 
ابويا : انت يا بقره ياللي بره ما تاكل اللي يتحطلك وانت ساكت 
انا : صباح الخير يا بابا يا حبيبي مالك يا بابا مضايق ولا حاجه 
بابا : هو اللي يشوفك علي الصبح يضايق ياخويا ( هسيبكم تتخيلو الطريقه اللي قالها بيها ) 
انا : ليه بس كده يا حاج دانا حتي بقول ديما انا ماليش غيرك 
ابويا : ها عايز كام ؟
احلي حاجه بحبها في ابويا انه فاهمني وبيجيب من الاخر 
انا : ايه يا بابا اللي بتقوله ده هو انا يعني عشان عايز حاجه اقولك كلمتين حلوين  هو انت تعرف ان ده اسلوبي برضه !!!
ابويا : ماتخلص ياض عايز كام ؟
انا : دول هما 25 جنيه  هجيب كشكول للمحاضرات
ابويا : 15 جنيه مش هيزيدو مليم انهارده 23 وعايزين نكمل الشهر مستورين 
انا :  يا عم مستورين ايه انت ليه محسسني انك بتشحت علينا !!!
ابويا : ماهو انت صحيح بتاكل في اته محلوله و..
انا : ثواني يا حج هجيب حاجه من جوه ( ودخلت وخرجت معايا كراسه كده صغيره ) وبدات اقرا 
انت بتاكل اته محلوله ومش حاسس انا بجيب الفلوس دي ازاي مانت عمرك ولا تعبت ولا شوفت القرش شكله ايه ... مش هو ده اللي كنت هتقوله يا حج ؟؟
ابويا : دا جيل ايه المهبب ده يا رب طول الليل علي النت والزفت والصبح يحرقو دمنا ... وفي هذه الاثناء انا البس وانزل واسيب الحج يكمل المحاضره بتاعته 
ادام باب الشقه لقيت مريم خارجه من شقتهم 
انا : صباح النور يا مريم عامله ايه
هي : صباح النور يا هندسه خارج بدري انهارده  يعني ؟؟
واحنا نازلين علي السلم 
انا : يا بنتي النشاط ده سمه من سماتي كعبقري يعني وكده 
هي ( باستهتار) : يابني انت في حاجه غلط في عقلك اكيد اكشف او اعمل اي حاجه ههههه
انا : خفه طيب ياله ياختي مدي شويه اتاخرنا والدكتور هيبهدلنا..
 هي : هيبهدلك .. هيبهدلك ... احنا يابني الدنيا عندنا حلوه حلوه 
انا : طيب ياله مدي بس شويه 
خرجنا من البوابه علشان الاقي عم مصطفي في وشي الحق يا عم مصطفي زباين ...
 هو بص وراه وانا اختفيت اصله اكيد الصبح هيجي يوجع دماغي ويحسسني انه مثقف وهو بيسمع الكلام غلط من الراديو اصلا 
ركبت الاتوبيس ولينا في الاتوبيس حكايه تانيه ومأساه وملحمه اي والله ملحمه ...


                                                                                                                    يتبع ......

فرصه ذهبيه

مادمت املك الاختيار فلن اعمل الا ما ارضي

وما دمت حرا لا يملكني احدهم فلن افعل الا ما يأمرني به عقلي

وساحشر انفي عندما اشعر برغبه في ذلك 

وسانسحب بهدوء عندما اشعر ان هذا افضل لي