عم محمود والدوله المسيحيه

في يوم من ذات الايام كان ياما كان ... ستوب 
انا مش هينفع احكي بالطريقه دي للاسف مش لوني .. خليني البس جلدي وارجعلكم ...
رجعتلكم .. ببساطه الموضوع كله بدأ وانا راجع من بره  بالليل كده لقيت عم محمود البقال قاعد عمال يشاور ويكلم نفسه .. علي فكره يا جماعه هو مش مجنون خالص دا راجل طيب جدا يعني .. المهم .. 
مالك يا عم محمود .. قالي استاذ خالد .. شوفت اللي بيحصل في المنطقه يا استاذ خالد .. راديت وانا حاسس ببعض الاسي وقلتله اهو ليبيا قربت وان شاء الله سوريا واليمن .. قالي ليبيا ايه وسوريا ايه يا خالد يا ابني ؟؟!! انا بكلمك عن المنطقه بتاعتنا الشارع بتاعنا يا ابني .. 
انا : الشارع !! ماله يا عم محمود ماهو زي الفل اهه .
هو: فل ايه يا ابني انتو لسه صغيرين مش مدركين للمؤامرة اللي بتترتب في الشارع ده .
انا : مؤامرة !! مالك بس يا عم محمود انت صاحي من بدري ولا حاجه وعايز تنام ؟
هو: يا ابني الاستاذ بولس جاب واحد اسمه هاني وسكنه في الدور التاني في عماره الحج علواني 
انا : انا اتجهت للشعر ولا ايه يا عمنا !! ههه لا بس حلوه .
هو ( بعصبيه ) : يا ابني انا مش بهزر الموضوع كبير دا اول حجر في بناء دوله مسيحيه في شارعنا .
انا : دوله !! كل ده عشان هاني سكن في الدور التاني؟!
هو : يا ابني الموضوع شائك جدا ..... 
انا : استني يا عم محمود شائك دي مش بتاعتك .. انت اتفرجت علي التليفزيون انهارده .!
هو : اه ويا ريتني ما اتفرجت بيقولك واحد كده اعلن قيام الدوله المسيحيه في مصر وهو في امريكا وانا خايف يا ابني لاجي في يوم معرفش اصلي الفجر في الجامع .
انا : يا عم محمود ينفع انت تفتح دكان في القاهره وانت عايش هنا في طنطا .
هو : لا مش هعرف اراعيه .
انا : هو كده البيه كان شارب كاسين وهو ماشي بيطوح دماغه خبطت في الحيطه فطلع الكلمتين دول وبعدين يعني ماهو هاني ده كان ساكن في حته تانيه قبل ما يسكن هنا يعني مزودش المسيحيين في شئ ولا ايه يا عم محمود ؟
هو : والله كلامك ده معقول برضه انا قلت انه شارب .
انا : يعني هو ده الجزء المعقول في كلامي .!! هههههههههه
المهم فهمت يعني ان الموضوع مش كبير اوي  كده .
هو : ربنا يطمن قلبك يا ابني .. انا اللي كان مجنني ان بولس ده راجل كويس واقول ازاي بس يشارك في كده ..
انا : مش كل حاجه بيقولها التلفزيون بتكون صح ..


مصر فيها ناس بسيطه كتير يا جماعه ناس عندها قابليه لتصديق اي شئ وبناء رد فعل لهذا الشئ حتي وان لم يكن موجودا 
مش بس عم محمود وكمان عم غبريال .. والموضوع لو متلحقش بدري بيبقي مشكله .. مش بعيد كنا نصحي نلاقي عم محمود عامل لافتات بتندد وتشجب سكن هاني في الدور التاني .. 
دا دورنا لما تشوف فكره مش صح متستناش انها تنتشر انشر الصح ... شكرا 


                                            لـ حامد عمر

كلام اتقال ..

* لو كان صنع الثورات سهل كده كانت امريكا دربت المعارضه في العراق او افغانستان ومكنتش راحت تحارب.

* اخويا في الفيسبوكيه .. ارجوك احذر .. الفيس يعطي معلومه ولا يصنع مثقف . 

* لما تقرأ معلومه .. اتأكد انك قرأتها صح .. ولما تتأكد .. اتأكد تاني .. وبعدين دور علي مصدرها .. ولو مصدرها موثوق فيه .. اقدر اقولك انها صح بنسبه 50%.

* لما تسمع كلام في الراديو يبقي صح بنسبه 50% ولما تسمعه في التليفزيون يبقي صح بنسبه 20% .

* امريكا تعتمد علي الزئير الان لأن اسنانها بدأت في التساقط .


* لما حد يقولك ان اسرائيل اقوي من مصر .. يبقي يا ميعرفش اسرائيل يا ميعرفش مصر يا ميعرفش ربنا . 


* ارجوك اعتبر اخبار الفيس زي الدواء .. ولا ينفع متاخدوش ولا ينفع تاخد منه كتير .


* صاحبك لما يبلغك خبر .. من الذوق متكدبوش .. من العقل متصدقوش .. من القلب ابوس ايدك متنشروش .

                                                 لـ حامد عمر

ثوره ولاد الكلب .. مقتل 3 مصريين

ببساطه ده مش مقال ولا تدوينه دي قصة حياتي من الساعه 9 انهارده لحد الساعه 10 يعني لمده ساعه اللي غاوي صداع يقراها واللي مش هيقراها ارتاح كتير .. 
فتحت الفيس تقريبا الساعه 9 زي ما قلتلكم وبدأت اشوف الاخبار ايه لقيت ناس عماله تتوعد اسرائيل ان مصر مش زي اللي عرفوها 30 سنه ونس بتشتم وناس فرحانه بشويه كلام لسه مش مؤكد ..
واحد منزل اغنيه يا اسرائيل لحمزه نمره 
والتاني  كاتب ان الجيش بتاعنا بياكل الفراخ نيه 
والتالت كاتبلهم اسألو ابوكم عن الجندي المصري في 73 
و..و..و.. 
المهم فكرت وبعدين ..
تبدأ الاحداث دائما نفس البدايه .. 
اسرائيل تعمل مصيبه .. ثم الاقي كل الناس حاطه صوره العلم وهو مولع او كلام عن اسرائيل .. ثم شتيمه في اسرائيل .. ثم عدم تحرك الجانب المصري .. ثم انتقال الشتيمه للحكومه المصريه ..
واحد هيقولي انت مجنون ده قبل الثوره .. مصر دلوات دوله تانيه .. وبصفتي من التراس ثوره يعني مؤيد جامد ودايما بدخل نقاشات موسعه دفاعا عن الثوره .. هصدقك .. لكن هل تعتقد ان القائمين علي الحكم الان في مصر يفكرون بنفس الاسلوب وبالتالي سنجدهم بعد ساعتين يعلنون الحرب علي اسرائيل .. حتي وان كنا بعد الثوره .. 
اري ما حدث طبيعيا ومتوقعا الثورات العربيه هي عنصر هام في حياه اسرائيل ولن تقف هي مكتوفه الايدي تجاه ما يحدث عربيا ولكنها ايضا تعلم جيدا ويعلم العقلاء منا انها لن تنجو مما يدور داخل الدول العربيه من ثورات لن تخرج اسرائيل مما يدور حولها بثوب سليم .. وستصاب .. وستتألم ولن يتم ذلك من خلال صوره البروفايل بتاع سيادتكم ولن يتم من خلال السباب ولا كمان من خلال شويه كلام بنهدد بيه ..
لا اظن بان الشباب الذي فكر في خدعه عمر سليمان واللي بعتبرها من اقوي ما ساعد علي استمرار الثوره واعلم ان الاغلبيه لم تسمع عنها اصلا وهو ايضا الذي فكر في اثناء الثوره في الكثير من الافعال التي كانت بمثابه ضغط مباشر علي الخصم في نص ملعبه مما ادي الي انسحابه وانهياره جزئيا حتي الان .. لا اظن بهم ابدا عدم القدره علي ايلام اسرائيل .. الحروب انواع والكل يعلم ولن اعدد انواعها فقد حفظنا هذا الكلام ... 
ولا بد ان نجد وسيله تؤلم اسرائيل ..
عندما قامت موجات الاعتراض علي الحكومه الاسرائيليه في قلب اسرائيل كنت من اول الداعين لمساندتها .. وتلقيت الكثير من التوبيخ .. وكلام زي ( دول عاملين المظاهرات دي علشان يزودو المستعمرات وعلشان الغاز بتاعنا يرجعلهم ) 
 وغلبت افهم الناس يا عم الحج ماشي .. خليني معاك ونحسبها براحه 
بذور ثوره في اسرائيل ضد الحكومه .. المصريين بيشتمو البذور دي ( ثوره ولاد الكلب لرواد تويتر ) .. الشعب الاسرائيلي مستغرب من موقف المصريين .. الشعب الاسرائيلي غاضب من المصريين .. الجيش الاسرائيلي يقوم بعمليه في سيناء ويهدد باعتداءات او ما شابه .. الشعب الاسرائيلي نارو تبرد من ناحيه المصريين .. الشعب الاسرائيلي يري ان حكومته جابتله حقه .. الشعب الاسرائيلي يعود الي منازله هادئ البال وراضي عن حكومته .. الاستقرار يعود الي شوارع تل ابيب .. ردايو اسرائيل ( تتوجه الحكومه الاسرائيليه بخالص الشكر لمصر حكومه وشعب علي الدور الذي قدمته مصر لاعاده الهدوء الي شوارع تل ابيب ) 
راديو مصر ( مشغل اغنيه قلنا هنبني وادي احنا بنينا السد العالي ) 
من يوم ما اتولدت ونفسي اعرف بنسمع ليه الاغنيه دي ماهو السد اتبني ومتنيل قرب يقع يعملولنا واحدا تانيه عن الترميم بقي 
المهم حبيت اقول اننا كنا ممكن وما زلنا نقدر نضرب اسرائيل في مقتل لو ساندنا ( ثوره ولاد الكلب ) 

                                                 لـ حامد عمر 

كن ما انت عليه ..

صدقني يا ابني في امل تكون احسن دا شئ مش مستحيل .. لكن هتقلد .. ممكن تبقي كويس لكن في النقاط المشتركه بينك وبين اللي بتقلده .. مستحيل هتكون افضل منه لانك زي المرايه .. مجرد مرايه .. هتعكس صورة الاصل .. طيب لو مفيش نور .. الاصل هيفضل موجود .. لكن انت .. بح 
تحمل من الكلمات ما لن تتحمله .. فالمبدأ ان لم ينبع من داخلك .. لن تقوي علي تحمله .. وستنقض ما تقول .. وبيني وبينك .. ساعتها هيبقي شكلك وحش اوي .. لا بجد .. اوي اوي :D

فكرت في يوم انك ممكن بتقليدك تتفوق .. طيب روق كده .. اهدي 
المبدع موجود وان اختفي المقلد .. والمقلد مختفي اذا لم يوجد من يبدع .. 

لكل منا عبقريته .. هناك من يبدع .. وهناك من ينقل .. وهناك من يسرق .. لكن المبدع يظل الاطول يدا .. والاقوي لسانا .. والابقي 

                                                    لــ حامد عمر