الاناركية المصرية

والله يا جماعة انا من فترة كبيرة برصد تشوهات لا خلقية في التفكير المصري .. ليس من باب التريقة والهزار وخفة الدم علي شعبي ..
لا والله انما اقصد التوعية بشكل خفيف يتناسب مع طبيعة الشعب الضاحكـ .


عندما تكون جاهلا فهذا ليس عيبا .. لانك لم تختار كونك جاهل .. لكن ان تتصنع المعرفة بدلا من السير باتجاة العلم .. دا يبقي عيب اوي ..

عندما يستمع المصريين لأي مصطلح غريب اول ما يخطر في بالهم هو ان هذا الشئ مجهول الهوية ما هو الا ديانة جديدة .. هذا اول ما يخطر ببالنا صدقوني ..

لن اتحدث عن ان هذا خطئنا ..لانه ليس كذلك ولكن هناك من ضربنا في مقتل وجعلنا نستسهل التخمين عن البحث ..


اذا اردت ان تخيف المصري من شئ ما . . ابحث عن مصطلح معقد يحمل نفس الفكرة .
مثلا ليبرالية وعلمانية وبتنجانية .. بس المصطلحات دي اصبحت دارجه في الاوساط الشعبية الان .. 


فوجد من يعتقد انه الاعلي مجلسا انه لا بد من وجود مصطلح جديد ليرهب المصريين ..
ولانه علي علم تماما بالطبيعة المصرية المهوسة بالمبالغة والتخمين ..


لو جيت علي واحد بسيط وقلتله العيال دي بيستعملو العنف والتخريب .. ستجد من رد فعله بعض من البرود ..
اما اذا اخبرته بأن العيال دي اناركيين .. تلاقيه يبرق .. ويقولك يا نهار اسود .. ازاي بس يا عم والله ما يبان عليهم الكلام ده .. شوف يا اخي وانا اللي كنت فاكر .. مع اني سلت عليه ورد السلام عادي .. اعوذ بالله ..
رغم ان الحج لم يفهم كلمة اناركي ولكنه اكتفي بالتخمين .. والتخمين يقول ان شكل الكلمة مريب الصراحة فيبقي اكيد ديانة جديدة .. ( طبعا دي الناس اللي ديما شايفه مصر مستهدفة دينيا )
النوع التاني هيقولك ازاي بس يا عم ماهو عادي اهه وكمان بيتكلم عربي كويس انا لسه مسلم عليه ورد عادي ومحستش انه ممكن يكون اناكري .. انكاري .. اناراكي ..
  بس علي فكرة تصدق كلامك صح فعلا دولة اناركيا دي من زمان عينها علي مصر ..


يا اخي كلف نفسك واسأل .. ابحث .. بلاش كل ده اسكت يا عم ..
نفسي اللي مش فاهم حاجة يعرف كويس ان ده مش لعيب فيه .. ولو سكت دا افضل ليه وللشارع بتاعهم كله :) 


نفسي نستغني عن المثل اللي بيقول ( الجواب بيبان من عنوانه )
 
اقرأ عن الاناركية
                                                                             لـ حامد عمر

سيب وانا اسيب !!

رأيت في الايام الماضية من المشاهد ما يدمي القلب وتخجل من انتماء قلة من المغفلين لنفس انتماءاتك ..

مثلا كوني مسلم والحمد لله .. موقف الجماعات والجهات التي تناشدنا بالاسلام - عدا قلة ازهرية - يكاد يصيبني بالجنون فهم لا يتحدثون بحديث الاسلام ولا تعاليمه ولكن للعامة انهم القائمون بأمر الله ..

مثلا كوني مصري والحمد لله ايضا .. موقف مجموعة كبيرة من المصريين سواء داخل اروقة الحكم او خارجها يكاد يجعلك تكره قوميتك التي ما يضرك سزي دفاعك عنها .. وللاسف رأينا جميعا بعض الثوار يقولون لماذا تنزلون الي الشارع للدفاع عن حقوق الناس التي لم تعد تريد الحرية ولقد ارتاحوا تحت نير العبودية ؟ ..

ولكني احب ان اعود الي الجذور واناقش الموضوعات من منبعها .

لذلك اركز دائما علي الكلمات دائمة التكرار لانها غالبا ما تكون مفاتيح للحلول النموذجية :)

نستمع كثيرا الي من يقول نناشد الثوار بأن يلتقطوا العناصر المندسة من وسطهم لانهم يشوهون صورة الثورة والثوار
واخر يصرخ .. ارجعوا الي بيوتكم حتي نري من الذي يخرب ويحرق ويضرب ..
وكأن هذه القلة المندسة مكونة من اطفال رضع ( ما يا برنس لو فكرت شويه احنا هنرجع البيت هيرجعو بيوتهم .. تدور انت علي المخربون لحد ما السمنة تسيح في الشمس ومش هتمسك حد .. تشاورلنا ان السكة امان انزلو تاني في التحرير .. ننزل نجري .. هينزلو معانا .. ولا غلط  ) .

هل تنكر ان هناك فاسدون داخل الجيش والشرطة وقطاعات الدولة ؟؟
اذا كانت الاجابة .. نعم, انكر .. لا تكمل التدوينة وقوم استحمي ونام ..
لو الاجابه .. لا, لا انكر .. انت جدع انت .. تعالي نكمل التدوينة..
..تعال اخي نقارن بين موقفين متشابهين الي حد كبير ..

الان لدينا ثوار بينهم( مندسون) .. ووجيش وشرطة بينهم ايضا خونة ومجرمون هنسميهم ( مندسون ) . 

طيب انت الجيش او الشرطة عارف عساكرك وظباطك وكل بيناتهم وبيانات اللي خلفوهم وقصة حياتهم ومع ذلك مش قادر تطلع القلة المندسة عندك ..

انا الثوار موجود في الشارع يعني اي واحد ماشي ممكن ينضم ليا ولا اعرف عنه حاجة .. طيب مين فينا اسهل انه يطلع قلته المندسة ... الثوار ولا الجيش .. 

طيب اذا كنت انت اسهل ومش قادر .. بتطلب مني اني اقدر .. 

وعلي غرار سيب وانا اسيب .. اقولك طلع قلتك المندسة .. وانا اوعدك ساعتها اني اطلع قلتي المندسة ..

                                                                            لـ حامد عمر  

مكرهتهاش !!

مكرهتهاش !!
 ايوا مكرهتهاش .. حاولو تاني تكرهوني فيها اصلي مكرهتهاش
ايه يعني شدوني من شعوري ..
ايه يعني علي الارض جرجروني .. 
دي ارض بلدي .. دي حضن امي .. بتجرجروني علي احن حضن .. 
ايه يعني جسمي انكشف .. اخواتي ستروني ..
انا اللي فضحتكم لما عرتوني ..

انا من مصر ظلمتني .. وبحبها .. 
ما ابويا وعمي وجدي وخالي .. هم اللي سكتو م البداية ..
هم اللي خلو شويه كلاب .. يعملو حكاية ..
لو كانو وقفو وقالو لا .. مكنش ف يوم عسكري بيحمي ... يجري ورايا 
حدفوني بالطوبة ورصاصة .. وفقعو عيني بس عينك لا ..

سلامة..
الف سلامة ..
برسملك بدمي طريق السلامة ..
مش راجع يا بلدي .. غيرلما اجبلك حقك ..
ولو مجبتوش ...  ابقي اسألي عني .. 
يا هموت فدا حبك .. يا المشنقة مكاني ..

معنديش مانع 

                                                                                                                      لـ حامد عمر

الظالم والمظلوم

العلاقة بين الظالم والمظلوم ابدية ..
مستمرة .. 
الي ان ينتفض المظلوم في وجه الظالم ..
عندها فقط .. 
يأذن الله لهذا البناء ان يتحطم .. 
هذا الضباب .. ينقشع 
عندها اما ان يموت الظالم فينتهي الظلم من اساسه...
او يموت المظلوم فتنتهي الانتفاضة ..

لذا عندما نخرج الي الشارع لن نعود الا اذا .. 
تعلقنا في المشانق ..
او علقناهم في المشانق .. 

                            

                                                                               لـ حامد عمر

فكر صح :)

النهاردة تدوينة هدافها اني اجمع حسنات ويا رب ربنا يجعلها في ميزان حسناتي وحسنات اللي ينشرها ويعمل بيها يا رب لحد يوم الدين :)
..
..
قولو امين :) 

1- لما حد يشتمك .. بدل ما تشتمه ....... ادعيله 
ادعيله ايه يا عم انت ..
ايوا ادعيله صدقني .. 
يا عم انت هتستشيخ فيها .. 
يا عم ولا بستشيخ ولا غيره .. تخيل كده واحد بيقولك يا كذا يا ابن الكذا .. وانت راديت عليه .. ربنا يكرمك وينجحك ويديك كل اللي تتمناه .. تفتكر هيكون رد فعله ايه ؟
..
..
2 - لما حد يعملك مشكلة او يضرك او يسعي انه يأذيك .. وهو دلوات مش ادامك طبعا .. قول .. يا رب بحق ما هو كان عايز يضرني .. اغفرله وارحمه 
طب لو هو ادامي اضربه طبعا .. 
لا يا سيدي مش هتضربه .. هتقول يا رب انا كاظم غيظي لأجل وجهك الكريم .. وتبتسم 
ابتسم !ّّ!! 
اها ابتسم .. واضحك كمان .. في البدايه صعبه .. بس ان شاء الله هتقدر وامسح كده بايدك علي صدرك .. كان في حاجة مش كويسة وانت بتشيلها :) 
 ..
..
3- بدل ما تدعي علي غافل .. ادعيله بالهداية :) 
مش محتاجة شرح دي اظن :D
..
..

4- ارجوك ارسم بعنيك ومخك دايرة صغيرة حولين كل واحد تعرفة حط ادام عنيك جوا الدايرة دي ( اموره الشخصية - اموره العائلية - لبسه - شكله - دينه - طريقة كلامه - نوع الموبايل اللي شايله - تسريحة شعره ) وحاول متكلموش عن حاجة منهم الا لو هو طلب ده :). 
..

..
5- افرح لغيرك يفرحلك .. امي دايما تقول كده .. جرب تسمع كلام امي وان شاء الله خير :) 

                                                                  لـ حامد عمر

حملة ركز

عزيزي المصري تعالا نبدأ سوا حملة ركز ..
 هدف الحملة ان سيادتك تركز شوية .. انا شخصيا شايف انك اتعرضت لمجموعة كبيرة من التجارب والخبرات اللي من الصعب استيعابها كلها في وقت قصير زي كده .

خصوصا ان بعض التجارب دي كانت صادمة لانها غيرت بعض الثوابت والحقائق العلمية بالنسبة لك . 
يعني لو رجعنا ورا شوية اول لما اكتشفو ان الارض كروية كانت صدمة قوية لانها هدمت بعض الاسس العلمية وقتها ولكن لا يمكن مقارنة هذه الصدمة بتلك التي تعرض لها المصريون عندما تنحي مبارك .. كانت هذه احدي الحقائق التي رسخت في صدورنا عندما تذكر كلمه رئيس فانها تعني مبارك ..

طيب بلاش الحقائق العلمية اللي اتغيرت كفاية عليك كمية المصطلحات الجديدة اللي اقتحمت حياتك من غير لا احم ولا دستور .. اظن دي كفايه انها تربكك .
بس معلش سامحنا وحاول تركز ..

قالو العلمانية هي فصل الدين عن الدولة ثم عادو ليقولو هي في الدين عن السياسة وفي الاصل كانو يعرفونها علي انها فصل الدين عن الدنيا .. ركز عشان التعريفات بتتغير من وقت للتاني حسب الصورة المناسبة
قال الليبراليين انهم دعاة حرية وعدالة وعندما خرجت من بعض منهم بعض الاقوال مما لن نرضاها قالو فلان لا يمثل الليبرالية . 
الاسلاميون هم جنود الله ودعاة الدين ولكن عندما تخرج من بعض منهم بعض الاقوال والافعال تجد من امتلك عقلا منهم يندد بما فعلة الاخ وهناك من يدافع علي استحياء وهناك من يدافع باستماتة( تحت غمامة تأليه الشيوخ )


ركز ... ارجوك ركز 


                                                                       لـ حامد عمر

بحبها لما ..

* بحبها لما عنيها تضيق وهي بتضحك .. لما اكون بحكيلها .. بضحك معاها .. بتريق عليها .. عيونها بتضعفني .

* بحبها لما تبصلي بحنان .. نظرتها بتبقي كلها امتنان كأنها بتشكرني علي وجودي .. متعرفش انها هي وجودي .. بتملكني بابتسامة هناك بعيد علي طرف شفايفها .

* بحبها لما تلمس بطرف صوابعها ملامحي .. لمستها انعم من ورقة وردة ناعمة علي خد بنت عندها 4 سنين .

* بحبها لما تكشر عشان بتكلمني وبتأخرت قبل ما ارد عليها .. بترسم الغضب علي ملامح حريرية مش ذنبها ان الغضب مبيعرفش يتجسد في ملامحها .. بتكون زي طفل بيمثل انه بيبكي .. يصعب عليك بس تضحك عليه .

* بحبها لما تتكلم عن ولادنا بحس وقتها بالسفر عبر الزمن .. بشوف ولادي منها .. بشوف حياتي معاها .. بشوفها .

* بحبها لما تتنرفز عشان عمال اهزر وهي بتتكلم جد .. بتحكي في موضوع مهم .. وانا بقاطع كلمها كل ثانية .. عنيها بتقول اسمعني .. وقلبها نفسه افضل اضحك ديما .. دا اقصي امانيها ضحكتي .

بحبها ...


                                                         لـ حامد عمر