يعني هموت يا دكتور ؟؟

المصريين : ناس بس مش زي كل الناس دول احسن ناس واجدع ناس واكتر شعب صادق وامين وشهم لا وكمان خد بالك ياللي انت مش مصري حب بلدك زي ما انت عايز اكيد مش هتحبها زي ما المصريين بيحبو بلدهم وركز شويه هتشوفنا اذكي شعب علي وجه البسيطه والخبيثه كمان ولو فاضي ممكن تعرف انه مصر هي محط انظار العالم وكل العالم سايب شغله وقاعدلنا احنا بقي عندك العالم بيتقسم جغرافيا لسبع قارات باين وبيتقسم مناخيا لنوعين وبيتقسم اقتصاديا لاربع انواع وسياسيا لسبع انواع 
بس اللي محدش يعرفه انه في تقسيمه تانيه ولا بتقيس بالموقع ولا المناخ ( الجو يعني ) ولا بالفلوس ولا بنظام الحكم لا دي تقسيمه جديده اسمها (المصريانيه) يقولك مثلا البلد الفلاني مصريانيتو 25% .
نشرح براحه , انطلاقا من مبدأ ان العالم كله قاعدين صايعين موراهمش حاجه غيرنا فكان لازم نصنف العالم الصايع ده . 
1- ناس بتحبنا 
2- ناس بتكرهنا 
3- ناس بيتأمرو علينا 
وطبعا التقسيم مبني علي الشعوب مش الحكومات لان الحكومات بتحكومها المصالح 
مثلا شعب بيحبنا زي البنات بتوع اوروبا اللي بتكون البنت منهم عايشه علي امل انها في يوم من الايام تتجوز مصري لان المصري بيقول كلام حلو وكده ( نفسي افتكر سمعت الكلام ده فين قبل كده ) 
شعب بيكرهنا زي مثلا الدول العربيه واللي بيغيرو مننا علشان احنا احسن منهم ( نفسي اعرف فـ ايه ؟؟) اللي بشوفو اننا كلنا عند كنسوب ( سالب اربعه ) تحت مستوي سطح التخلف .
شعب بيتأمر علينا زي اسرائيل وحاليا شعب الفلول ودي قبائل بدائيه ظهرت في اوائل عام 2011 ميلاديه نتيجه تفكك الدوله الحاكمه .

يا جماعه , يا اخوانا , احنا مستهدفين من نفسنا اكتر ماحنا مستهدفين من الناس .
فكرو في البلد وملكوش دعوه بالناس اللي حولينا ابوس رجليكم قبل ايديكم .
نفسي اعرف ليه لما بنكون عايزين نمدح نفسنا بنجيب امثله عن دول علي انها اسوأ مننا .
ولما نكون مضايقين شويه ونفسنا نشتم روحنا بنجيب نفس الدول كامثله لدول افضل مننا . 
يا جماعه بجد ده مرض ولو متخلصناش منه ابقي قابلني شكرا ..
كان في واحد كده زمان قال ( مشكله مصر في النفوس .. ولا هي في الشوارع ولا في الفلوس ) وسلمولي علي الحبايب ..


                                                     لـ حامد عمر