بلد العجايب

مقالنا اليوم من ذلك النوع الذي لم تعتاد عزيزي القارئ ان تراني اكتبه او لعلك تعتاد.


الموضوع كله اننا ( انا ونفسي ) كنا راكبين ميكروباص( 14 راكب خط البيت-الكليه ) وفكرنا سوا انا وهي ،
هنعمل ايه في الامتحان بتاع بعد بكره، واحنا قاعدين نفكر لقيت السواق -في نادره من النوادر- بيشغل اغنيه غريبه علي السواقين الاغنيه للفنان (محمد منير)وهي اغنيه( ورده الجزائريه) تقريبا اللي هي (شئ من بعيد) اغنيه حلوه اوووي المهم العمده منير- كما احب ان اسميه- بيقول فيها( بيقولي حصليني علي بلد العجايب ) وطبعا زي مانتو عارفين او مش عارفين نفسي مش بتعدي حرف بدأت تقولي هو يقصد ايه ببلد العجايب دي  قلتلها وحياتك ما اعرف،
بس هي اكيد بلد فيها اللوحه الارشاديه بتاعت الطريق تقولك اتجاه اجباري لليسار وتفضل ماشي خمسه كيلو انك تلاقي الاتجاه ده مفيش .
 لاحظ كمان ان في كل العالم وفي العالم كله لما تلاقي الظل بتاع الميكروباص بيبعد عن الرصيف  يبقي العربيه بتبعد عن الرصيف لكن هناك في البلد ده في احتمالين اما ان العربيه بتبعد فعلا او الرصيف هو اللي بيبعد والله اعلم.
اكيد في البلد ده في الناس اللي هم بيقولو( الحق يا عمنا  بيقولك  الاخوان لو مسكم البلد هيلبسونا عبايات قصيره ) وكأن هذا اسوأ ما سيفعله الاخوان.
واكيد كمان البلد دي فيها واحد كده ( اخوان ومتقولش لحد ) يقولك يا عم الديموقراطيه اختراع يوناني قديم ايام الوثنيه ومن تشبه بهم فهو منهم .
وتسأل واحد يعني ايه ليبراليه يقولك ( دا نظام الحكم في ليبيريا قديما ) بجد مهزله ( موقف حقيقي ) .
هو نفسه البلد اللي واحد (اهلاوي ) يقولك ( الزمالك ده عار شوف اغلبيه اللي عملوه كانو انجليز دا نادي الاحتلال الي مزبله التاريخ ) والله يا شيخ اي مزبله انضف من المزبله اللي خرجت بالكلام ده.
فيرد الجانب الابيض ( زملكاوي ) ( هو انتو مش واخدين بالكم ان معظم رموز الفساد كانو بيشجعو الاهلي يعني دا نادي الفساد - دا طبعا من المزبله اللي جنب الاخ اللي فوق - عشان كده تحس انه نفس نوع الزباله .
وتتحول الهتافات الثوريه في ذلك البلد الي هتافات كرويه رغم انه هندسيا لا علاقه بين الثوره والكوره .
وتلاقي واحد محترم جدا يقولك النظام القديم كان معيشنا في((( امان)))) ،فيرد واحد ويقولو انت فل وانت .... ، يا جماعه ليه المقارنه وتضيع الوقت بين النظام القديم والنظام الثوري( المؤقت) ما دام كده كده النظام القديم مش هيرجع يبقي لو شايف عيوب في النظام الثوري( المؤقت) - وما اكثرها -  نحاول نصلحها سوا           سووووووووووووووووووووا


                                                                              بقلم حامد عمر